Audie Avenido: Guitar Hero of Greyhoundz

Photo Credit: Llammado Magasin

     

           I met Audie Avenido because he is a friend of my boss and officemates. In our office, we call him brother Audie. When we had outing he was there also and jammed with us. Like the typical rocker image, he has long hair with tattoos on his body. He may look wild or aggressive but this guy is really cool. Despite the popularity of his band in the Pinoy rock scene, he is still simple and humble. This attitude makes it easy to get in touch with him. During an outing, we sang to videoke and I was surprised because he knew how to sing ballads. Who said that a rocker does not have a soft side? 

Xian Lim, Binastos ang Mga Taga-Albay?

              
            Sangkot ngayon sa kontrobersya ang aktor na si Xian Lim matapos nitong tanggihang i-promote ang lalawigan ng Albay nang siya ay dumalo sa Fiesta Tsinoy Albay. Ayon sa ulat, hindi diumano isinuot ng aktor ang t-shirt na ibinigay sa kanya ng isang staff ng Tourism sa naturang lugar at hindi rin tinanggap ang coffee table book na iniabot sa kanya. Sinabi diumano ng aktor sa harap ng marami na hindi siya naruon para i-promote ang Albay.

            Hindi nagustuhan ni Gov. Joey Salceda ang inasal ni Xian. Sa kanyang Twitter account, ipinahayag ng gobernador ang kanyang pagkairita sa pagtanggi ng aktor na i-promote ang Albay. Ipinamukha nito sa aktor na noon pa mang maliit ang kanyang talent fee (75,000 pesos) ay inimbitahan na nila ito sa kanilang pagdiriwang ng Ginoo ni Madayon. Ngayong kilala na siya ay nagbayad sila ng 350,000 para sa pag-guesting niya sa Fiesta Tsinoy Festival.

            Sinabi ni Salceda na ilan lang naman ang posibleng dahilan kung bakit ganun ang inasal ni Xian. Una, hindi ito napalaki ng maayos ng kanyang mga magulang. Posible rin diumanong mababa lang ang antas ng edukasyon na naabot nito. O ‘di kaya’y ‘di maganda ang paraan ng paghawak sa kanya ng management. Sinabi rin ng gobernador na hindi bagay sa mukha ng aktor ang ugali na mayroon ito. Baka rin daw may kung ano na sa aktor.

            Sa kabilang banda ay humingi na ng paumanhin si Xian kay Gov. Joey Salceda at sa mamamayan ng Albay hinggil sa isyung kanyang kinasangkutan. Ipinaabot niya ito sa pamaagitan ng pag-post sa Twitter. Ipinaliwanag nito ang dahilan kung bakit siya tumangging isuot ang t-shirt ng Albay. Hindi diumano totoo ang napabalitang sinabi niyang hindi siya pumunta roon para i-promote ang Albay. Ang eksaktong sinabi niya raw ay “Sorry po hindi ko maisuot yung t-shirt baka kasi magka-conflict sa endorsement ko. Pasensya na po”.

            Ngunit sinabi ni Salceda na hindi niya mapapatawad ang aktor sa ginawa nito. Mataas pa naman ang kanilang ekspektasyon kay Xiam dahil hindi siya terorista kundi isang artista. Wala namang ipinahayag ang gobernador kung ituturing ba niyang ‘persona non grata o ‘di na puwedeng puwedeng pumunta sa kanilang lalawigan ang aktor.

Fallen 44, Gagawan ng Pelikula ni ER Ejercito?

 

           Nakatakdang gawin ang pelikula ng pakikipagsapalaran ng Fallen 44 na nasawi sa engkuwentro sa Mamasapano laban sa tropa ng mga Moro Islamic Liberation Front (MILF) at Bansangmoro Freedom Fighters (BIFF). Ito ang ipinahayag ng dating gobernador ng Laguna na si ER Ejercito sa kanyang Facebook fan page.

            Nais diumano ni Ejercito na sa pamamagitan ng pelikula ay mabigyang pugay ang Fallen 44 at para na rin mabigyan ng tamang pagkilala ng publiko hinggil sa kanilang kabayanihan.  Ang nasabing pelikula ay pagbibidahan mismo ni Ejercito na minsan na ring gumanap sa mga makasaysayang pelikula gaya ng buhay nina Aguinaldo at Asiong Salonga. Ito naman ay ididirehe ni Pedring Reyes.

            Umani ng iba’t ibang reaksyon mula sa netizens ang balak na pagsasapelikula sa Fallen 44. Mayroong natutuwa at mayroon din namang nagsasabi na sumasakay lang sa usapin si Ejercito. Marami ang nagtatanong kung saan iikot ang istorya gayung ‘di pa tapos ang imbestigasyon kung ano talaga ang nangyari noong Enero 25. 

          May mga nag-iisip tuloy na baka gamitin ni Ejercito ang pelikula para banatan ang administrasyong Aquino lalo na't marami ang naninisi sa pangulo hinggil sa pagkamatay ng fallen 44. Dahil pinaniniwalaan nilang si P-Noy at ang dating PNP Chief na si Alan Purisima ang nagplano ng misyon sa Mamasapano na tinawag na Operation Exodus. Matatandaang nasibak sa puwesto si Ejercito dahil sa labis na paggastos sa kampanya sa eleksyon. Naniniwala siyang posibleng ang Malacanang ang nasa likod kung bakit siya napatalsik sa puwesto. 

Ex-Boyfriend ni Mahal na si Jimboy Salazar, Magpapakasal na sa Kanyang Boyfriend?

            Mga ka-netizen, mukhang nauuso yata ang pagpapakasal ng mga nasa third sex,ah. Kamakailan lang ay nagpakasal sina Aiza Seguerra at ang kasintahan nitong si Liza Dino. Ginanap ang kanilang pag-iisang dibdib sa California dahil ‘di naman legal ang same sex marriage sa Pilipinas. Ngayon naman ay nagpahayag si Jimboy Salazar na ex-boyfriend ni Mahal na magpapakasal  na raw sila ng kanyang kasintahan na nagngangalang John sa susunod na taon.

            Malamang naaalala mo pa si Jimboy. Oo siya ‘yung malaking tao na nagpapa-interbyu noon sa TV na nagmamahalan daw sila ni Mahal. Eh, obvious namang iba naman ang habol niya kay Mahal. Kitams ‘di rin nagtagal ang relasyon nilang dalawa. Noong bandang huli, lumadlad na lang ito si Jimboy. Sa panayam sa kanya ng isang programa sa telebisyon noong 2010, inamin ni Jimboy na siya ay pusong babae. Kaya’t imbes na tawagin siyang Jimboy ay Jimgirl na lang ang itawag sa kanya. Sinabi pa niyang hindi diumano madali ang lumantad ng tunay mong katauhan. Alam mo na, ang mga jokla sa atin ay kadalasan nagiging biktima ng diskriminasyon at nagiging sentro ng panlalait at pinagtatawanan.

            Nabuo raw ang planong pagpapakasal ni Jimboy at ng kanyang kasintahan na isang entertainer sa Singapore nang nandun daw siya sa bansang ‘yun. Sinabihan ito ni Jimboy na baka makahanap ito ng ibang karelasyon habang nandun. Para mapawi ang pag-aalala ni Jimboy ay inalok na siya diumano ng kasintahan na magpakasal na sila sa sunod na taon. Siyempre, payag naman agad si Jimboy sa alok na kasal at baka nga makawala pa ang boyfriend sa kanya.


            Sinabi ni Jimboy na ang gusto niyang maging tema ng kanilang kasal ay beach wedding. Gusto niya magsusuot siya ng mala-fairy tale na damit at dapat  ang lahat ay naka-all white, pero makukulay na bulaklak ang nasa paligid. O, paano ‘yan mahal, mauunahan ka pang maikasal ng ex-boyfriend mo na minsan mo pang ginawan ng kanta tungkol sa kanyang sexual orientation. Kunsabagay, matagal na rin naman siyang nagpaka-Jimboy at ngayon ay masaya na siya sa kanyang pagiging Jimgirl.

Aiza Seguerra at Liza Dino, Gusto nang Magkaroon ng Anak

 

               Kamakailan ay ikinasal na sa San Francisco,California ang magkasintahan na sina Aiza Segurra at Liza Dino. Halu-halo ang naging reaksyon ditto ng mga tao. Mayroong nagpahayag ng kanilang suporta at meron din namang mga bumabatikos. Hindi pa rin kasi tanggap sa lipunang Pilipino ang pakikipagrelsyon sa magkapareho ng kasarian. Pero ipinagkibit lang ng mag-partner ang mga negatibong reaksyon at ngayon nga ay pinag-uusapan na nila ang pagkakaroon ng anak.

                Ayon kina Aiza at Liza, isasagawa nila ang kanilang plano sa pamamagitan ng biological insemination. Dati nang napabalita ang plano nilang ito. Ayon sa ulat, ililipat ang egg cells ni Aiza kay Liza at saka sila maghahanap ng sperm donor. Pupuwede itong magmula mula sa kanilang malapit kaibigan. Mayroon na diumano silang doctor sa Amerika na nakausap para magsagawa nang naturang plano. Mayroon nang anak si Liza mula sa dati nitong naging karelasyon at si Aiza na rin ang tumatayo bilang ama nito sakasalukuyan. Pero nais pa rin nilang magkaanak para masabing pareho itong nagmula sa kanila.

                Sa kasalukuyan, bukod sa pagkakaroon ng baby, pinaplano na rin nina Aiza at Dina na magsagawa ng ritual ceremony ng kanilang kasal ditto sa Pilipinas kahit na mayroon pang mga tumututol. 

Nathalie Hart, Binatikos Dahil sa Enjoy Rape Post sa Instagram

            Kaliwa’t kanang batikos ngayon ang natatanggap ng starlet na si Nathalie Hart matapos siyang mag-post ng kanyang litrato sa Instagragram na may caption na “If rape is invitable, layback and enjoy it.” Ang bagay na ito diumano ay kanyang natutunan mula sa kanyang ama. Hindi ito nagustuhan ng mga netizen partikular na ang kababaihan, lalung-lalo na ang mga babaeng nakaranas na ng sekswal na pang-aabuso.

            Marami ang nagalit sa post ni Hart dahil para sa kanila ay okay lang naman pala ang ma-rape. Kaya’t maluwag lang itong tanggapin at huwag nang manlaban pa total ay wala na rin namang magagawa. Ang kanyang pahayag ay mistulang nagpaaanyaya pa sa mga rapist na mang-abuso ng kababaihan. Maging ang DJ na si MO Twister ay nagpahayag ng kanyang pagkainis sa ipinost ng starlet at dahil dito ay inun-followed na niya ito.

            Sinabi pa ng mga netizen na ang panghahalay sa kababaihan ay hindi kinukunsinte sa anumang bansa o kahit anong kultura. Ang mga gumagawa nito ay dapat na pinaparusahan. Isa itong mabigat na pagkakasala kaya’t hindi rin tama na basta na lang ginagawang biro. Matatandaang nabiktima ng rape joke ang respetadong broadcaster na si Jesicca Soho sa concert noo ng komedyanteng si Vice Ganda. Dahil sa masamang biro ay maraming nagalit kay Vice.

            Matapos na makatanggap ng mga kritisismo, agad din namang humingi ng paumanhin si Kath sa mga indibiduwal na kanyang nasaktan. Wala siya diumanong intensyon na makapanakit ng damdamin ng iba at inamin niyang masamang biro nga ang kanyang nagawa. Pinaninindigan niya na hindi niya isinusulong ang pang-aabuso sa kababaihan lalung-lalo na ang panghahalay sa mga ito.

            Unang nakilala si Hart bilang Princess Snell at produkto ng Starscruck Avenger ng GMA-7. Siya ay nakasama sa romantic comedy movie na Somebody to Love at kasama rin siya sa cast member ng Shake, Rattle and Roll XV. 

Bamboo Mañalac, Patay na Raw?

 

           Nababalitang patay na diumano ang singer/songwriter na si Bamboo Mañalac. Ito ay kumalat sa Facebook at Twitter matapos na may nag-post na isang blogger na may nagsasabing namatay ang singer dahil sa drug overdose. Ang post ay naglalaman ng Youtube video na may larawan ni Bamboo na ang nakusulat ay “RIP Bamboo Mañalac 1976-2014”. Ang video ay nagrirekomenda na i-share bago mo ito ma-access, pero sa ngayon ay ‘di na accesable ang nasabing video.

            Tila yata naging gawi na ng ilang mga blogger ang mag-imbento ng mga istorya kabilang na nga rito ang pagpatay sa mga kilalang personalidad para lamang dagsain ng traffic ang kanilang website. Balewala sa kanila ang makapanlinlang ng mga tao at makasakit ng damdamin ng mga taong pinapatay nila sa mga pekeng balita. Ang mahalaga lang sa kanila ay ang kumita ng pera mula sa gawaing ganito. Kaya’t ‘di na rin nakapagtataka kung bakit laganap ang ganitong istilo. Ilan lang sa mga personalidad na nabalitang namatay na ay sina Jose Manalo, Willie Revillame, Paolo Bediones at kung sinu-sino. Kung inyong maaalala, maging si Dolphy bago namayapa ay ilang beses na ring pinatay sa pamamagitan ng mga malisyosong balita. Asahang sa susunod pang mga linggo ay mayroon uling mababalita na namatay na raw, pero kapag inalam mo ay hindi naman totoo.

            Hindi ito ang unang beses na naging biktima si Bamboo ng malisyosong balita. Kamakailan lang din ay napabalitang kapatid niya raw ang aktres na si Dawn Zulueta kahit na ‘di naman sila magkaanu-ano. 

Bench Naked Truth, Binira ng Mga Netizen!

     

Photo from interaksyon.com

 
              Bagama’t nagging matagumpay ang pagdadaos ng Bench Naked Truth na ginanap kamakailan lang ay marami rin naming mga netizen ang ‘di natutuwa. Kahit sabihin pa na marami rin namang nasiyahan dahil talaga namang napaka-daring ng kanilang mga modelong artista. Tuwang-tuwa ang kababaihan kasama na rin ang mga nasa third sex kina Tom Rodriguez, Paolo Avelino at iba pa. Dahil talaga namang nagpakita sila ng kani-kanilang katawan, suot lang ang brief. Seksing-seksi naman ang mga babaeng kalahok gaya ni Solen Huesaff, Sarah Labahti na nakipaghalikan pa sa kanyang kasintahan na si Richard Guiterez.

                Pero ang ikinagalit ng ilan ay ang paglabas ni Coco Martin habang may hila-hilang babae na mistulang isang aso. Kunwari ang babae ay isang pet lang at habang si Coco naman ay isang master. Ikinagalit ito ng Gabriela at ni Sen. Pia Cayetano. Dahil isa itong uri ng stereotyping na wari bang ang gustong ipakita ay ang mababang pagtingin ng kalalakihan sa kababaihan. Idagdag pa rito ang pagiging sobrang daring ng nasabing palabas. May mga nanawagan pa na i-boycott ang mga produkto ng Bech.

                Dahil sa kaliwa’t kanang batikos na inabot ng mga organizer ng Naked Truth ay humingi na ng paumanhin ang may-ari ng Bench na si Ben Chan. Sinabi niyang wala silang intension na makapanakit ng damdamin ng ibang tao. Pero ipinangako niyang magiging maingat na sila sa susunod nilang show.


                Ikaw ano ba ang palagay mo sa isyung ito? Aba’y hindi nga naman maganda ang ipinakitang partieng master and pet ng palabas ng bench. Pero kung sa pagiging daring lang naman ay ‘di na siguro itto dapat pang palakihin pa. Hindi naman pambata ang nasabing palabas. Kaya lang ay lumagpas na sa limitasyon ang mga modelo gaya ng mag-partner na sina Richard at Sarah. Tama ba na maghalikan sa harap ng mga manunood? Kahit sabihin pa na wala naman ritong masama dahil mag-parter naman sila. Pero at least, nag-sorry na si Ben Chan sa ‘di magandang parte ng kanilang palabas. Nakalimutan niya yata na marami pa ring mga konserbatibo rito sa Pilipinas. Napabalita pa nga na nagbitaw ng mabigaw na salita laban sa organizers ng Naked Truth si Mayor Rodrigo Duterte ng Davao na papatayin niya raw ang mga nag-organisa nito. Kung totoo mang sinabi niya ito, Mayor ang puso mo, please!

A Close Encounter With Tado Jimenez: Not Your Ordinary Comedian

                 He is Arvin Jimenez, also known as Tado, a truly Marikeño although he is a native of Leyte. If you know him personally, you will learn that he is not just a comedian. Maybe he looks funny because of his style: a long haired guy with thick sunglasses. But this man has a lot of skills and talent. Aside from being a comedian, he is also a host, event organizer, businessman, biker and many more.

Pinoy Newsbook Dance Showdown 2013: Ka-tropa, Halina't Magsayaw at Magbasa!

      Nito lang Abril 9 ay naimbitahan ang inyong lingkod ng Pinoy Newsbook kung saan ay nagsusulat ako ng kolum, na maging isa sa mga hurado sa kanilang Dance Showdown sa may Sta. Cruz Covered Court, Antipolo City. Layunin ng paligsahang ito na hikayating magbasa ang mga kabataan at para na rin mailayo sila sa masasamang bisyo. Labing-dalawang grupo ang nagpakitang gilas ng mga sandaling ‘yun. Ito pa lang yata ang diyaryo na nag-orginasa ng ganitong aktibidades Kaya’t masasabing ibang klase talaga!

    Ito ang unang beses na maging hurado ako sa dance contest. Pero naranasan ko na dati na maging hurado sa balagtasan, pagsulat at pagbigkas ng tula. Kung tutuusin ay napakalayong larangan ng pagsusulat at pagsasayaw. Pero pareho itong sining, sa pagsusulat ay mga salita ang nangungusap. Samantalang sa sayaw ay tiyempo, ritmo o galaw ng katawan ang ipinapakita. Ang sayaw para sa akin ay para ring pagsusulat dahil bawat piyesa ay may kuwentong inilalahad.

                                        Ang Pagbabalik ng Original Pintados

    Unang sumalang ang Ang Pagbabalik ng Pintados. Nakakabilib ang grupong ito dahil costume at props pa lang ay talagang pinaghandaan na nila. Sumayaw sila ng Singkil na kilalang katutubong sayaw ng mga kapatid nating mga Muslim. Mahusay ang tiyempo ng kanilang mga galaw. Hindi lang sila sa katutubong sayaw humataw kundi pati na rin sa modern dance. Lalo nang ihagis-ihagis nila sa ere ang pinakabata nilang miyembro. Siguradong napapalunok laway ang mga manunuod dahil sa tindi ng aksyon. Unang kalahok pa lang ay mainit na, whew!

Pinoy Indie Music sa Internet, Umaarangkada!

Kung musika lang ang pag-uusapan ay sadyang ‘di pahuhuli ang mga Pinoy sa paggawa ng kanta. Katunayan ay marami tayong mga artist at composer sa buong kapuluan. ‘Yun nga lang ay ‘di gaanoong napagtutuunan ng pansin. Dahil mas sinusuportahan pa ng iba ang mga awiting likha ng mga dayuhan kaysa sariling atin. Bukod dito ay sadyang kakaunti lang ang nakakapasok sa mainstream industry dahil napakahirap nitong pasukin.

Buti na lang at mayroong internet kung kaya’t nagsipagsulputan ang mga online radio station kung saan ay buong pusong sumusuporta sa mga musikerong Pinoy. Dahil dito ay nagkaroon ng pagkakataon na mapakinggan mapa-banda man o solo artist na pawang nasa hanay ng tinatawag na indie scene. Kahit sabihin pa na mayroon namang You Tube na maaaring mapagbahaginan ng obra. Maganda na rin na may internet radio na nagpapatugtog ng kanilang mga kanta. Napapag-isa pa nila ang mga artist na nagkalat kung saan-saan. Hindi katulad dati na wala talagang outlet ang mga musikerong nais maibahagi ang kanilang mga komposisyon. Maririnig lamang sila kung mayroon silang gig o tugtugan.

Kabilang sa Pinoy internet radio ay ang dig.com, radiopilipinas.com, sari-sarisounds.com, bootleg-radio.com at iba pa. Dahil din sa paglaganap ng social networks ay nagkaroon ng application para makapagtayo ng radio station sa Facebook. Ilan dito ay UR Facebook na itinatatag ni RJ o Ramon Jacinto matapos na mawala ang kanyang radio station sa FM. Isama na rin natin ang Renegade Radio Station na nakabase sa San Mateo, Rizal.

Banggitin na rin natin ang indiepinoy.com na nagpapa-download ng mga kanta ng mga indie artist para mapakinggan sa cellphone. Maging ang pilipinasjamsession.com na maraming bandang nakarehistro sa kanilang site. Maaaring mapakinggan ang kanilang kanta sa mismong profile ng banda o sa mismong homepage ng PJM. Nariyan din ang Indie News sa FB na walang sawang nagbabalita ng mga bagong kaganapan sa Pinoy indie music.

Ang ilan sa mga nabanggit na internet radio station ay mayroon ding mga sariling DJ na nagsasalita. Habang ang ilan naman ay sumasahimpapawid sa pamamagitan ng paggamit ng pod cast at walang DJ na nagsasalita. Kumbaga, tuluy-tuloy lang ang kanilang pagpapatugtog ng mga kanta. Ang ilan sa mga DJ o mismong humahawak sa mga ito ay mga musikero kung kaya’t tunay naman ang kanilang pagmamalasakit sa mga kapwa musikero. Ang maganda pa ay nag-oorganisa sila ng mga gig sa tulong na rin ng mga production na naglipana ngayon.

Kung tutuusin hindi naman ganoon kadami ang nakikinig sa internet radio kumpara sa mga tradisyunal na istasyon ng radyo kumpara sa ibang bansa na sadyang marami ang nakikinig ng internet radio. Ang mahalaga ay ang pagiging dakila ng layunin ng mga humahawak nito. Ito ay ang mapausbong pa ang musikang Pinoy. Sayang nga naman kasi ang talento ng mga musikerong Pinoy kung wala man lang silang magiging outlet. Hindi naman nais ng mga online radio na tapatan ang mga FM stations dahil malayo pa ito bago mangyari. Dahil na rin sa ating pang-ekonomikong kalagayan, na marami sa atin ay walang kakayanan na magkaroon ng kompyuter. Pero isa lang ang sigurado dapat lamang na tangkilikin ang musikang Pinoy. Marami pang mga artist na dapat mapakinggan hindi lamang yaong mga sikat. Marapat lamang na mapakinggan din ang kanilang mga likhang awitin.

Poets Not Dead: Nang umawit ang mga makata

                                       

Sinasabing magkaiba ang mundo ng makata at ng mga mang-aawit. Dahil ang isa ay hanggang sa papel na lang ang tinig. Nagkakabuhay lang ang tula kapag ito ay binibigkas. Habang ang isa naman ay nabubuhay sa pagkanta. Pero paano kapag umawit na ang mga makata? Katulad na lang ng aming duo ni JunJun Merano, na ‘di kuntentong ang tula ay manatiling hanggang tula na lamang.

Elementarya pa lang ay naggigitara na at gumagawa ng kanta si JunJun. Habang ang inyong lingkod naman ay nahilig sa pakikinig sa mga alternatibong awitin noong haiskul. Ito ang nakaimpluwensiya sa akin para magsulat ng mga liriko. Sa isip ko ay mga salitang waring nag-aawitan na kailangang mailabas. Oo, mas nauna kong nakahiligan ang ganito kaysa paggawa ng libro.

Nagkakilala kami at naging magkaklase ni JunJun noong kami ay nasa kolehiyo. Nagsanib kaming dalawa sa paglikha ng mga awitin. Ngunit nang makapagtapos ng pag-aaral ay nahinto ang aming tambalan. Para na rin harapin ang aming mga personal na buhay. Ngunit ang pagmamahal sa musika ay naroon pa rin. Kaya’t nitong taong 2011 ay binuo namin ang Poets Not Dead upang ipagpatuloy kung anuman ang aming nasimulan. Layunin naming ibahagi sa publiko ang mga nilikhang awit. Nang sa gayun ay huwag itong masayang.

Marahil may mga magtatanong kung bakit ganun ang aming pangalan? Simple lang, kami ay kapwa makata at ‘di na ito mawawala sa amin. Pareho kaming naniniwala na ang tula at musika ay sadyang magkaugnay. ‘Di ito maipaghihiwalay. Alisin mo ang tono at tugtog ng isang kanta at ito’y magiging tula. O lagyan mo ng tugtog at tono ang isang tula ito ay magiging kanta na. Lahat nang ito ay nanggaling sa kaloob-looban ng gamawa nito. Pero siyempre, may mga kanta na poetic ang dating.

Marami sa aming mga kanta ay isa munang tula bago maging kanta kabilang na rito ang Ulan at Bulaklak, Paano Ko Sasabihin, Kristal, Pikit Mata Kong Titingnan at iba pa. Sa Ingles naman ay nariyan ang Cry, Cry, Cry The Butterfly (halaw sa awiting pambata na Fly, Fly, Fly the Butterfly), Once in a Lifetime Pals at Watch The World How to Die na tumatalakay sa nangyayaring karahasan sa mundo.

                                      

                                                     

Naniniwala rin kami na bagama’t importante ang pagkakaroon ng trademark ng isang banda o grupo, dapat ay hindi ito nagpapatali sa iisang istilo lamang. Kaya naman iba’t ibang klase rin ang aming kanta. May love song, novelty o kung ano pa mang klase ‘yan. Nangyari ito dahil magkaiba ang aming impluwensiya namin ni JunJun sa musika. Mas impluwensiyado siya ng pop habang ako naman ay mahilig sa rock music. Pero nagpang-abot kami sa gitna. Kaya naman masasabi kong maganda ang aming tambalan. At ‘di kami nagtatalo kung ano ba ang dapat naming kantahin.

Ang aming duo sa kasalukuyan ay isa lamang indidependiyente at tulad ng iba, tanging sa internet matatagpuan ang mga kanta. Umaasa kami na sa hinaharap ay maraming maabot ang aming musika. Para marinig ang aming mga awitin maaaring hanapin ang Poets Not Dead sa You Tube o ‘di-kaya’y i-like ang aming page sa Facebook.

Parokya ni Edgar Music Fever

             Tanging  ang Parokya ni Edgar, bandang sumikat noong early 90’s ang nananatiling aktibo sa pagbabanda.  Matagal ng buwag ang kanilang naging kasabayan tulad ng Eraserheads, Yano, The Youth at iba pa. Samantalang ang River Maya ay bago na ang mga line up. May mga banda naman na galing pa nga sa Dekada 80 na hanggang ngayon ay buo pa rin. Ngunit ang mga ito ay mga nasa underground scence. Hindi katulad ng Parokya ni Edgar na nasa mainstream at hanggang ngayon ay patuloy pa ring lumilikha ng kasaysayan sa musikang pinoy.  Sino ba naman ang ‘di nakakaalam ng kanilang mga awitin gaya ng Harana, Pizza Pie at marami pang iba?

             Minsan ay napanood ko ang bandang ito sa Marikina Riverbanks na inorganisa ng Asean Computer of Science And Technology. Habang nagpi-perform ang grupo ay buhay na buhay ang mga tao. Nagsisipagsayaw sila habang tumtugtog ang Parokya gayung kung tutuusin ay hindi naman masyadong rock ang tugtog. Halos love song pa nga ang karamihan sa kanilang mga kinanta. Nangangahulugan lamang ito na hanggang ngayon ay malakas pa rin ang dating ng grupo sa mga kabataan.  Sabi nga ni Chito Miranda, bokalista ng banda, “’90’s pa lang nagbabanda na kami. Baka di pa nga kayo pinapanganak noon. Pero salamat at nagkikita-kita tayo.” Nagpapasalamat din siya dahil kahit na marami nang nagsulputang mga banda ngayon at magagaling naman ay ‘di pa rin nila nakalilimutan ang Parokya ni Edgar.

           Ngunit bakit nga ba pumatok ang bandang ito at hanggang ngayon ay humahataw pa rin? Marahil ang sagot d’yan ay Pinoy na Pinoy ang dating ng kanilang mga awitin. Madali lang sakyan ng kahit na sino ang kanilang mga liriko. Ito ay patungkol sa iyo, sa akin, sa kanila o sa ating lahat. Isa pa, iba-iba ang paraan ng kanilang istilo sa pagtugtog. May mga banda kasing monotonous ang dating. Halos pare-pareho lang ng tono o ‘di-kaya’y ng tugtog kaya’t nakasasawang pakinggan. Hindi katulad ng Parokya ni Edgar, samu’t saring istilo ang kanilang napaglalaruan. Mula sa malumanay at maging sa mabibilis na tono ay nagagawa nila. Kahit pa ang mapa-rap o rock  ay kayang-kaya nilang gawin. Kumbaga, nakakapag-adjust ang kanilang istilo sa pagbabago ng panahon.  Kumbaga ay hindi sila natatabunan bagama’t may mga panahong ‘di in ang pagbabanda dahil pumapasok din ang panahon kung saan nauuso ang accoustic, rap, R & B at kung anu-ano pa.

            May payo si Chito sa mga kabataang nagbabanda, “Sa mga nagpa-praktis-praktis pa lang o sa mga nag-iisip pa lang ng pangalan ng banda. Ipagpatuloy n’yo lang ‘yan. Para kahit wala na ang Parokya ni Edgar ay marami pa ring banda sa Pilipinas.” Ito kaya ay pahiwatig na malapit na silang mag-retiro? Hindi naman siguro, alam lang nila na darating din ang panahon na mabubuwag sila. Nais lang ng Parokya na mananatili pa ring masigla ang pagbabanda sa Pilipinas anumang klase ng musika ang mauso.

Carmina Topacio: Bagong Pinoy na patok sa You Tube!

Mainit na pinag-uusapan ang kababayan natin ngayon na si Carmina Topacio, labing-walong taong gulang at kasalukuyang nag-aaral sa Dela Salle University. Siya ang sinasabing bagong pinoy singing sensation sa You tube. Ito ay dahil na rin sa dami ng bilang ng mga tumitingin sa kanyang mga pinost na mga video ng kanyang pagkanta sa naturang sikat na site. Bukod sa mga cover song ay mayroon ding mga original song si Carmina.

Hindi na rin naman ito nakapagtataka dahil kung talagang mayroon kang pambihirang talento ay lulutang at lulutang ka. Kahit sabihin pang napakaraming mga tao ang nangangarap na makilala ng mga tao sa pamamamagitan ng Internet. Pangunahing instrumento na nga rito ang You Tube para babigyan ng opurtunitidad ang kahit na sino. Sino ba naman ang ‘di makapapansin sa dalagang ito, na bukod sa husay sa pagkanta ay marunong ding mag-piano at maggitara. Bukod dito ay nabibiyaan din ng pambihirang ganda, na kung titingnan ay parang Japinay. Maaaliw ka talaga habang siya ay iyong pinapanuod dahil mayroon itong natural na karisma.

Ayon kay Carmina sa isang post niya sa kanyang blog(www.carminatopacio.cjb.net), bata pa alng siya ay mahilig na talaga siyang kumanta. Nagre-record na rin siya noon at gumawa pa ng sariling cd. ‘Yun nga lang ay ‘di niya ito ipinapakalat kundi pang-sarili lang. Hindi naman daw niya na hangad na sumikat o makilala. Napagkatuwaan lang din niyang mag-post dahil nauuso ang pagpo-post ng kung anu-ano’ng video sa You Tube. ‘Di niya akalaing marmaing papansin sa kanya dahil ilyun-milyon ang mga naka-post dito. Na-sorpresa na lamang siya ng msobrang dami na ng nag-subcribe sa kanyang channel. Pero inamin niya rin na gusto niya ring ma-discover. Sabi nga ni Carmina, “Sino’ng musician naman ang ayaw ma-discover, ‘di ba? It’s always been o dream of mine to have my own album.”

Pero sa totoo lang ay maaari na siyang maihanay ngayon sa mga sikat na Pinoy blogger na si Happy Slip, magkaiba nga lang sila ng medium. Ang kasikatan ngayon ni Carmina ay maaaring magbigay daan sa kanya para kuhanin ng isang malaking higanteng network ng telebisyon at ng recording company tulad nang nangyari kina Moymoy Palaboy na nadiskubre rin sa You Tube. Kapag nagkagayun ay mas maganda dahil may aabangan na naman tayong bagong mukha o bagong pangalan sa entertainment industry. ‘Yan ang talento ng Pinoy, namamayagpag talaga!

Musika at pulitika

“Bato-bato sa langit
Ang matamaan ‘wag magalit
O bato-bato bato sa langit
Ang matamaan ay
wag masyadong halata.”
-Upuan

Bibihira ka lang makaririnig ng mga kantang may pulitikal na mensahe sa mainstream music dahil halos karamihan ng kanta ay nakasentro sa usaping pampuso o mga kantang pampakilig. Dahil ito diumano ang kantang tanggap ng nakararami at hindi ang mga kantang pumupuna sa maling sistema sa pamahalaan. ‘Di nga ba tanggap ng mamamayan o baka naman sarado lang talaga ang isipan ng mga producer dahil mayroon silang mga masasagasaan? Maliban sa namayapang master rapper na si Francis M at sa bandang Asin noong araw. Sa ngayon, ilan lang ba sa kanila ang naglakas loob na umawit ng mga kantang may bahid-pulitikal? Maririnig mo lang ang ganitong uri ng musika sa mga alternatibong kanta o underground scene.

Napapanahon ang kanta ng sikat na rapper na si Gloc 9, na ang titulo ay “Upuan.” Ilang araw na lang kasi ay eleksyon na naman at maraming mga pulitiko ang nangangako ng pagbabago. Sa dami na ng mga taong lumipas, nakapagtataka kung bakit ito na lang lagi ang bukambibig nila. Ibig bang sabihin ay wala naman talagang ipinagbago o kung mayroon man ay baka ito ay ‘di sa maganda? Ang bawat isa na rin ang makakasagot sa katanungang ito kung mayroon nga bang pagbabago sa bayang kinalalagyan at sa mismong bansa natin.

Marahil ay pamilyar na kayo sa kantang nabanggit. Ito ay patungkol sa mga nakapuwesto sa gobyerno. Kung pakikinggan ay napakasimple lang ng liriko pero mayroon itong mabigat na mensahe. Habang namumuhay ng mariwasa ang pulitiko ay ‘di naman nito pansin ang mga mahihirap na kanyang nasasakupan. Kumbaga, puro sariling interes lang ang nasa isipan. Kung minsan, ang nakakapagtaka ay isinusuka na ng mga tao ay bakit nananalo pa rin? Dapat ba ritong sisihin ang mga botante dahil sila rin naman ang nagluluklok sa puesto sa pulitiko. O baka naman kaya ito nangyayari ay dahil na rin sa pandaraya o ‘di kaya’y paggamit ng dahas. Sana ay matigil na nga ang dayaan sa eleksyon sa pamamagitan ng paggamit ng kauna-unahang automated election sa bansa natin.

Ano nga ba ang mayoon sa isang upuan at marami ritong nag-aagawan. Mabuti sana kung ito ay para talaga kagalingan ng bayan at hindi para sa samu’t saring benipisyo na rito ay makukuha. Hindi sana porsiyento sa mga proyekto ang habol o ‘di kaya’y impluwensiya o kapangyarihan lang ang habol. Sabi nga sa kanya ni Glog 9, “Sabi pa nila ay dito mo rin matatagpuan/Ang tao na nagmamay-ari ng isang upuan/Na pag may pagkakatao'y pinag-aagawan/Kaya naman hindi niya pinakakawalan.”

Pinoy sa Kulturang Popular ng Mga Koreano

 Sa kasalukuyan ay patok na patok sa ating mga Pinoy ang mga tele novella na gawa ng mga Korean. Mapapanuod ito sa telebisyon, mayroon sa umaga, sa tanghali hanggang sa gabi. Bukod sa naisalin na ang mga ito sa Tagalog ay ginagawan pa ito ng Filipino version. Ngunit bago pa man sila ay nauna nang namayagpag ang mga tele novella na gawa sa Mexico .

Isa lang ang ibig sabihin nito, naiintindihan o nakaka-relate tayo sa kanilang mga istorya. Bagama’t magkaiba ang isitilo ng paggawa nila ng kuwento. Dito sa atin ay masyadong maligoy at tumatagal ang isang palabas base na rin sa dami ng sponsor na pumapasok. Samantalang sa Korean ay mabilis ang facing ng kuwento at sa mga main character lamang umiikot ang character. ‘Di tulad sa atin na kahit ang maliliit na character mayroon ding istorya kung kaya’t kung minsan ay nakakaumay na ring panuorin. Ngunit ‘di ibig sabihin na mas magaling silang magkuwento sa atin. Marahil ay mayroon lang isinaalang-alang ang mga producer. Halimbawa ay ang takot gumawa ng naiibang istorya dahil baka hindi masakyan ng marami.

Hindi lamang sa palabas namamayagpag ang mga Koreano. Kasama na rin dito ang musika. Sino ba naman ang hindi nakaaalam ng kantang “Nobody” na pinasikat ng Wonder Girls. Bukod sa maganda na ang kanta ay maganda rin ang steps at ang mga singer ay mistulang manekin na sumasayaw. Isama na rin natin ang grupo ni Sandara Park , isang Koreanang naging artista dito sa Pilipinas, ang grupo diumano nilang 2en1 ay gumagawa ng pangalan sa Korea . Dahil na rin sa nauuso ang K-pop culture sa atin ay marami na rin sa ating mga kababayan partikular sa mga kabataan ang gumagaya sa isitilo ng kanilang buhok na maiiksi ang buhok tapos may bangs sa kababaihan. Samantalang patagilid naman ang bangs sa kalalakihan.

Sabi ng ilang sociologist ang tinatawag na K-pop culture ay ‘di naman talaga sa Korea nanggaling. May bahid na rin ito ng impluwensiya sa mga Kanluraning bansa partikular sa Amerika. Ngunit hindi na ito mahalaga, ipinapakita lang nito na matindi na talaga ang kanilang impluwensiya sa atin. Kumbaga, nasakop na nila tayo, hindi sa aspetong pisikal kundi sa puso’t pag-iisip. Wala namang masama sa paghanga sa kultura ng iba basta’t huwag lang sosobra. Kung tutuusin ay namumutiktik tayo kung kultura lang naman ang pag-uusapan. Marahil ay darating din ang araw na tayo naman ang gagayahin ng iba. Ngunit ang higit na pagpapahalaga sa sariling kultura ay sa atin mismo manggagaling.

OPM sa gitna ng MTV(Music Tagalog Version)

Kilala tayong mga Pinoy pagdating sa galing sa pagsusulat ng kanta at pag-awit. Ilan sa mga kompositor na maipagmamalaki natin ay sina Benny Saturno, Ryan Cayabyab at marami pang iba. Kapag mayroong ngang mga patimpalak sa pag-awit, mapa-barangay o national level man ay kabi-kabila ang mga sumasali. Bukod dito ay marami ring mga artist na naghihintay lang ng break para maipakita ang kanilang talento. May mga artist na nakikilala dahil sa sarili nilang komposisyon. Pero mayroon din namang napapansin dahil sa panggagaya sa kanta ng iba.

Lubhang kapansin-pansin ngayon ang mga pagsasa-Tagalog ng kanta ng mga sikat na foreign artist. Kabilang na rito ang kanta ni David Cook na “Always Be My Baby” na ginawan ng sariling version ni Lamberto “Lambert” Reyes na galing sa Dream Academy Season 2 ng Kapamilya Network. Ang sa kanya naman ay “Ikaw Lang Ang Iibigin.” Hahanga ka dahil ang timbre ng boses ay kahawig din kay David Cook. Makinig ka rin ng musikang rap at RnB ay marami ring tagalized version. Madalas na gayahin ay ang kanta ng RnB artist na si Akon.

Ayon sa mga baguhang artist na nalilinya sa pagta-tagalized version ay maganda raw ang kanilang ginagawa dahil madaling maintindihan ng mga pangkaraniwang tao ang mga kanta ng dayuhan na palagi nilang naririnig. Kahit sabihin pang hindi naman eksakto ang kahulugan ng salin nila ng isang orihinal na kanta. Hinahabol na lamang nila ang na maging magka-rhyme ang bawat dulo ng mga salita. Ang iba nga, ginagawa pang novelty ang kanilang liriko para makapagbigay diumano ng kasiyahan sa mga tao. Sino ba naman ang hindi matutuwa kapag narinig mo ang paborito mong kanta ay may salin din pala sa Tagalog? Bukod sa Tagalog ay mayroon ding mga kantang Ingles na isinasalin sa ilan nating diyalekto.

Hindi na bago ang ganitong senaryo, kundi paulit-ulit lang. Marahil ay mahilig lang talaga tayong mga Pinoy na magkaroon ng counter part ng isang sikat na foreign artist. Ang iba naman ay ginagawa lang itong stepping stone para madaling mapansin ng mga tao. Dahil pamilyar na ito sa publiko kaya’t pati sila ay madadamay na rin sa kasikatan. Isa na nga rito si Miss Ganda na nagsalin ng maraming awitin gaya ng Umbrella ni Rihana, Bleeding Love ni Leona Lewis at iba pa. Ang malungkot nga lang, matapos nilang manggaya ay mas naa-associate pa rin sila rito kahit na mayroon pa silang mga orihinal na komposisyon.

Pero hindi lahat ng tao, artist man o hindi ay pabor sa ganitong kalakaran. Ipinapakita lang diumano nito na masyadong mataas ang paghanga natin sa mga dayuhan. Kung tutuusin ay kayang-kaya naman nating makipagsabayan sa kanila. Wala namang masama sa ganitong sistema basta’t huwag lang sosobra. Dahil Kung ang lahat ng mga baguhang artist ay ganito ang gagawin ay pababansutin lang nito ang Original Pilipino Music (OPM). Mas mainam pa rin kung ang pagyayamanin ay ang sarili nating musika lalo na’t mayroon naman talaga tayong talento pagdating dito!

Para sa iba pang babasahin.

Musika ng Panggagaya, Umaarangkada!

Makatawag-pansin ang pag-arangkada ng mga kantang banyaga na isina-Tagalog ng ilang mga baguhang mang-aawit. Hindi masasabing ngayon lang ito nagsimula dahil noon pa man ay mayroon na ring ganito. Kaya mali ang sinasabi ng isang disc jockey sa isang FM station na pinag-eksperimentuhan lang daw nilang magsa-Tagalog ng mga kanta. Hindi naman nila akalaing papatok ito sa mga listener. Sikat na sikat nga ngayon ang kantang “Payong” ni Miss Ganda, salin mula sa “Umbrella” ni Rihanna. Maging ang “Low” ni Florida at “Smack That” nina Akon at Eminem ay may Tagalong version din, binaboy nga lang o ginawang kalokohan. Dahil ‘di naman isinalin mula sa orihinal na lyrics, kumbaga ginawa lang magkasing-tunog.

Hindi na nakapagtataka kung patok man ito sa mga listener. Una dahil popular na talaga ang mga kantang ito, na sinakyan lamang ng mga baguhang mang-aawit para mapansin din sila. Mahirap nga namang magpasikat ng kanta lalo na’t kung bagong pasok pa lang sa eksena. Kaya kung hindi revival ang ginagawa ng iba tulad ng grupong MYMP ay ito ngang pagsasa-Tagalog ng mga kantang mula sa banyaga. Isama pa natin sa dahilan ang katotohanan na likas na sa ating mga Pilipino ang pagkakaroon ng colonial mentality. Kung papansinin ang industriya ng aliwan, mpa-radyo man o telibisyon ay pinangingibabawan ng mga kanta at programang banyaga. ‘Di ba’t sa telibisyon ay namamayagpag pa rin ang mga Korean Novela, na ginagawan pa ng Filipino version. Uso rin ang pagkuha ng franchise ng mga palabas mula sa ibang bansa. Patunay lang ito na sadyang tinatakilik natin ang lahat ng ito.

Sasabihin ng ilan na wala namang masama sa ganitong uri ng kalakaran. Maganda nga raw ang ganito para maintindihan daw ng marami. Bunsod na rin daw ito ng pagpapalitan ng kultura ng magkakaibang lahi. Pero sa bawat panggagaya ay walang ibang nasasakripisyo kundi ang ating sariling kultura at kalinangan. Eh, ang tanong, tayo kaya kailan makapagbibigay ng impluwensiya sa ibang bansa? ‘Yun bang tayo naman ang ginagaya at hindi tayo ang laging nanggagaya? Kung mayroon man sa ating nanggagaya ay hindi ito ganuon kalakas katulad sa atin.Pero gaya-gaya nga lang ba ang Pinoy? Maaaring oo at maaari rin naming hindi. ‘Di kasi ako lubusang naniniwala na gaya-gaya lang ang mga Pinoy dahil nag-uumapaw tayo sa talento lalo na sa pagsusulat ng mga liriko. Dahil kung si Miss Ganda mismo ang tatanungin ay mas gusto niyang gumawa ng orihinal na musika na nagmumula sa kanyang kaloob-looban. Pero sa ngayon sama-sama muna tayong magsipagkuha ng paoyng dahil inuulan na tayo ng musika ng panggagaya!

Reynaldo Lapuz:Ang tunay na wagi sa American Idol

Kung mayroon mang tunay na nagwagi sa katatapos lang na American Idol Season 7 ay hindi si David Cook. Bagama't siya ang itinanghal na kampeyon ay hindi mapapasubaliang ang ating kababayan na si Reynaldo Lapuz ang higit na umagaw ng atensyon sa sino pa mang mga kalahok sa nasabing patimpalak. Pumatok nang husto sa buong mundo ang kanta niyang We're Brothers Forever.

Noong Jan. 2008 ay umire sa telibisyon ang ginawa niyang pag-aaudition sa American Idol sa may Dallas,Texas. Kung saan ay siya ang pinakahuling contestant. Suot pa lang niya ibang klase na, hindi mo maintindihan kung cowboy ba o si Elvis Presley na nagsuot lang ng kapa at sumbrero na may tatak pang pangalan ng judge na Simon Cowell. Panay papuri pa ang kanyang iginawad kay Simon na kilala sa pagiging kilabot na judge. Pero para kay Reynaldo ay mistula itong santo dahil nakakatulong sa mga musikero na makilala. At nang kumanta ay komposisyon pa niya ang kanyang tinirada. Bibihira lang sa mga contest na orihinal na komposisyon ang kantahin ng isang contestant. Kadalasan kasi ay 'yung mga sikat na para masakyan ng mga tao. Pero si Reynaldo ay walang takot na kinanta ang sarili niyang awit. Kaya pala ganito siya ay isang kompositor at isang mang-aawit. Talaga namang naaliw 'di lang sina Simon, Paula Abdul at Randy jackson ang naaliw kundi ang lahat ng tao sa buong mundo na nanunuod ng sandaling yaon. Ako nga tuwang-tuwa sa kanya, hindi ko pa nga alam noon na isa pala siyang Filipino kundi isang Intsik. Bagama't hindi man lang nakapasok sa mga nag-top ay waging-wagi na siya. Huwag siyang ihilera kay William Hang na napansin din noon. Dahil si Hang ay puro cover songs ang ginawa at si Reynaldo ay hindi.

Si Reynaldo ay dati palang traysikel drayber sa atin bago mag-migrate sa Amerika at nagtrabaho rin sa Tate bilang dyanitor sa Greyhound at Wallmart. Tulad ng ibang Pilipino na nasa ibang bansa, naduon din siya para makipagsapalaran.

Mabuhay ka, Reynaldo Lapuz!

Ang pag-usbong ng musikang Bisaya

1017 band

Kapansin-pansin ang biglang pag-usbong ng mga musikang ang liriko ay may halo o purong bisaya. Kung dati-rati ay hindi ito pinapansin siyempre iba na ngayon. Dahil lagi nang naririnig sa mga FM radio station ang ganitong uri ng musika. Ito lang ay nagpapatunay na nakapasok na nga sila sa mainstream. Ipinapakita lang nito na maging sila a hindi pahuhuli kung musika lang an gpag-uusapan. Bukod pa rito ay nariyan ang pagnanasang ibahagi sa mga hindi Bisaya ang kanilang diyalekto. Hindi rin naman maiaalis na marami tayong mga kababayan na nagmula sa Visayas kaya't pumatok ang ganitong uri ng awitin.

Ihalimbawa natin ang grupong 1017, na mula sa Davao, sila ang nagpasikat sa awiting "Dodong Charing." Ito ay tungkol sa ka-text mate na inaakalang babae. Subali't huli na nang malaman na ito rin pala ay isa ring lalake nang maubos na ang pera sa kabibigay sa charing na ito. Pinili nilang maging novelty ang istilo para maging catchy sa mga taga-pakinig at hindi nga naman sila nagkamali dahil pumatok ang kanta nilang ito. Ang grupong ito ay binubuo nina Jam-Jam Ruiz( lead vocals), Beam-Bam Lungakit( bass guitar), Chokoi Pasaquie(lead gutiar,vocals),Mckoy Al-ag,(rhythm guitar, vocals) at janpoy Fortich(drums).

Kasalukuyan ring umuusbong ng tinatawag na Bisrock o Visaya Rock na kinabibilangan ng grupong Smooth Friction, Blood of The Stone, Enchi, atbp. Ngunit nauna nang umeksena sa mga ito ang bandang Urban Dub at Cueshe na parehong nagmula sa Cebu na nakikipagsabayan sa mga banda rito sa Maynila. Bagama't hindi bisaya ang kanilang ginagamit sa kanilang kanta ay ipinagmamalaki nilang sila ay mga probinsyano.

Ayon sa isang sociologist, ang pag-usbong ng musikang bisaya raw ay isang anyo ng pagpapanatili ng kanilang sariling lengguwahe at sariling identidad. Kadalasan kasi ay baduy ang tingin ng iba sa ganitong klase ng musika. Ngunit nilansag nila ito dahil sa rami ng tumatangkilik sa ganito. Mabuti raw ang ganito dahil ito rin naman ay sakop ng wikang Filipino. Hindi ito nangangahulugang para 'di sila maintindihan ng mga 'di Bisaya. Bakit naman daw ang mga lirikong Intsik, Mexicano atbp. ay pinakikinggan ng mga tao kahit 'di nila naiintindihan? Bakit ang wikang Bisaya na sariling atin ay hindi? Maganda diumano ang ganitong senaryo dahil nagiging bukas na tayo sa ibang dayalekto sa atin. Sana sa sunod ay 'di lang musikang Visaya ang umusbong kundi maging ang sa mga Ilokano, Capampangan, Hilagaynon atbp.