Christmas Gimmick sa Marikina River Park

    Tuwing sasapit ang panahon ng Kapaskuhan  ay nagkakaroon din ng tiangge sa Marikina River Park. Dekada ’90 pa lang nang mag-umpisa ito, na pinasimulan ng dating Mayor na si Bayani Fernando. Talagang dinadayo ito ng mga tao, hindi lamang ng mga taga-Marikina kundi pati na rin ng mga taga-karatig lugar. Hindi lang naman ang mala-Divisoria na presyo ng mga bilihin ang habol ng mga tao rito kundi pati na rin ang ambiance rito. Masarap kasing mamili tapos sasabayan mo pa ng pasyal sa ilog.

            Samu’t sari ang mabibili mo sa tiangge. Halos lahat na ng hanap mo ay narito na mula sa mga bag, damit, tsinelas, sapatos, t-shirt, personalized mug, mga laruan at kung anu-ano pa. Sa dami ng puwesto ng mga tiangge rito ay imposibleng wala kang mapamili. Kahit ang sampu-sampu isa ay ‘di rin mawawala rito. Kung may kasamang bata ay hawakan itong mabuti dahil baka mawala. Dagsa rin kasi ang mga namimili rito na matiyagang nag-iikot para makapili ng kanilang bibilhin.

            Hindi lang tiangge ang makikita mo sa Marikina River Park kundi meron din ditong perya, na nagsisilbing nagisilbing hari ng amusement center noong hindi pa uso ang mga mall sa Pilipinas. Ano pa ba ang makikita sa perya kundi samu’t saring mapaglilibangan gaya ng mga rides at samu’t saring palaro gaya ng color games, bingo pati na rin ang paghuhulog ng piso sa mga box, pag-target sa baloons at kung anu-ano pa. Barya-barya lang ang kailangan para makapaglaro nito at malilibang ka na.

            Nag-set up din dito ng horror house na tinatawag na Kakaba-kaba sa Bahay ni Lola. Maliit lang ang iikutan, pero puwede nang panakot sa mga bata. Pero kahit maliit ang bahay ay nagawa pa nilang lagyan ng maze kaya’t hahanapin mo talaga ang pintuan palabas. May nagduduyan na patay na nasa parang kabaong sa loob ng bahay ni lola at siyempre ‘di rin mawawala ang mga taong nakasuot ng maskara. Ibang klase nga lang ang kanilang sound effect dahil puro kalampag sa yero sa ang ginagawa nila. Paraan na rin siguro nila para makapanakot.

            Kung rides naman ang pag-uusapan, merong pambata gaya ng merry go round. Kung pamatay ang hanap na rides ang hanap mo, meron din ditong roller coaster, viking at round up o twister. Meron ding space rocket na talagang hihiluhin ka nang husto at para bang maiiwan ang kaluluwa mo sa tao, ayon na rin sa mga nakasubok nito. Aba’y panuorin mo nga lang, nakakahilo na; ‘yun pa kayang ikaw ang nakasakay sa ganito?

            Kapag napagod na at nagutom sa pamimili at paglalaro sa perya, nagkalat din dito ang mga kainan. Maraming klase ng pagkain ang mapagpipilian, may pang meryenda lang gaya ng footlong, kabab at iba pa. Kung heavy meal ang hanap, aba’y marami n’yan dito. Name it and you will get it, ‘ika nga. Maraming ulam na mapagpipilian mula sa inihaw na tilapia, bangus at pusit; barbeque at kung anu-ano pa. Puwede ka pang mag-videoke habang kumakain o ‘di kaya’y mag-dinner sa harap ng ilog.

            Kaya’t tuwing panahon ng Kapaskuhan, bakit hindi mamasyal sa Marikina River Park?