Ang Pag-ibig Mo

Mahal, huwag kang lumimot sa gitna ng pag-alala

Ng bawat sandaling tayo'y magkasama

'Di ba't ito'y may dinadalang sigla?

Sa mundong 'di alam kung saan ang punta.

Mga mata natin ay mayroong kislap

Kapag tinititigan ka'y ayoko nang kumurap

Ayaw ng bumitaw 'pag ikaw'y yakap-yakap

Sa himaymay ng diwa ko ikaw ang kalangkap.

Kapag 'di ka nakikita lubhang kainip-inip

Damdamin may kalungkutang kahalukipkip

Marahil 'pag nawala ka masisiraan ng isip

Ngayon pa man ding baliw na sa 'yong pag-ibig.

Langit sa lupa aking natagpuan

Sa piling mo'y mayroong kaligayahan

Ang umibig pa sa iba'y 'di ko hahayaan

'Pagkat sa pag-ibig mo lang nananangan.

Batid kong mahal mo rin akong sadya

'Pagkat ang puso'y hinding-hindi madadaya

Bagama't sinasabing natuturuan pa nga

Ngunit pag-ibig mo'y sumibol ng kusa.

Ang pag-ibig mo ay walang kasing tamis

Ninanamnam ko sa puso ng labis-labis

Nawa ito ay 'di na mapapalis

'Pagkat sa habambuhay ikaw na ang nais!