Bulaklak-Hangin

Sana 'di ka basta isang bulaklak-hangin

Na sumasabay lamang sa pag-ihip

Waring inililipad ng hungkag na panaginip

Pagkatapos ay 'di na masilip

'Di na matagpuan sa aking harding-silid.

Lalong h'wag kang maging bulaklak-tubig

'Di mabubuhay minsan lang 'di madilig

Naglulunoy lamang sa maghapon

'Di alam kung saan paroroon

At malulunod sa madaling panahon.

Kung bulaklak-hangin ka mang sadya

Hingahan mo ako upang maging payapa

Upang magkaroon ng buhay yaring tula

Hipan mo ang namumuong mga luha

Nang matuyo at di na mabalisa.

Ngunit h'wag ka sanang basta magpaparamdam

Na 'pag hinahabol ay nawawalang lubusan

Bagkus sa piling ko ay manahan

Maging bulaklak-hangin ka na aking nahahawakan

Mabubuhay kata, mistulang walang kamatayan!

Puspusin mo ako ng iyong bango

Upang matanggal itong pagkahilo

Sa mga salitang bunga ng pag-ibig ko sa 'yo

Ilusyon man subali't totoo

Bulaklak-hangin ka na sa diwa ko'y nabuo

Sa puso ko, ikaw'y 'di maaabo!