Putol

           “Ari ng kabit ni misis pinutol ni mister”. Punyeta! Ganito ang nakalagay sa headline ng tabloid na nabasa ko. Bigla akong nahintakutan sa nabasa kong ito. Pakiramdam ko para akong nanood ng horror movie. Nagtindigan kasi lahat ng balahibo ko sa katawan. Manginig-nginig ko pang hinawakan ang diyaryo habang binubuklat ang mga pahina para mabasa ang kabuuan ng napakahalagang balita. Hindi dahil nakalagay ito sa headline. Alam ko namang style lang ng mga dyaryo ang paglalagay ng kung anu-anong headline para makatawag ng pansin. Gaya ng babae na nanganak ng isda, bebot na ni-rape ng ka-textmate at kung anu-ano pang kahindik-hindik o kakatwang bagay. Sa dami ba namang kakumpetensiya, kailangan talagang gumimik. Ano ba namang kinalaman nito para sa nasyonal na interes?

 

         Pero sa palagay ko ay napakaimportanteng bagay nga ang headline na ito sa tabloid ngayong araw. Bakit ko naman nasabi?  Simple lang. Dahil ang pinutol ay hindi lamang basta simbolo ng pagkalalaki kundi sentro ng kaligayahan na inaasam ng Eba man o ng tinatawag na ikatlong kasarian. Common, kung ikaw ay lalaki ay gusto mo bang maputulan ng ari? Na kapag naputol ay para ka nang inutil. Oo, buhay ka pa rin naman at makakapagtrabaho pa. Pero para saan pa at natawag kang lalaki gayung putol naman pala ang iyong ari? Kahit sabihin pang mayroon pa namang kamay at dila. Buti pa ang alaga kong aso na si Putol, buntot lang ang wala.

 

    Mahirap yatang magaya sa asawa ni Lorena Bobit na pinutulan ng ari ang asawa. Uubra lang siguro ito sa mga bading na gustong magpa-sex change. Pero sa gaya kong barako, no way! Magkamatayan na kung magkamatayan huwag lang maputulan. Pero sa kabilang banda, naiisip ko rin na makabubuti ito sa mundo kung ang magiging parusa sa mga rapist ay ang pagputol ng kanilang ari. Malamang sa hindi ay bababa ang kaso ng rape saan mang dako ng mundo. Hindi ‘yung nakakabit lang sa dakilang bayani natin ang salitang ‘putol’.- “Andres Bonifacio a tapang a tapong, a putol ulo indi atakbo. A putol a titi a takbo”.

 

        Marahil dala lang ito ng sobrang galit. Pero sa pagkakataong ito ay lalaki ang namutol ng ari ng kalaguyo ng kanyang misis. Ano kaya ang nasa isip ni mister habang pinuputol ang ari ng kalaguyo ng kanyang misis?  Nasa isip niya siguro na kailangang maputulan ng ari ang lalaki para wala nang ibang sandata pang kahumalingan ang kanyang asawa. Napakahirap sigurong tanggapin kapag babae ang nagloko kaysa lalaki na proud pa kapag nambabae. Medyo hindi nga yata patas ang mundo.

 

       Habang binabasa ko ang diyaryo naalala ko ‘yung sinabi sa akin ng girlfriend ko na kapag nagloko ako ay putol daw ang akin. Biro man o totoo nakakatakot talagang isipin na maputulan ka ng ari. Bigla ko ring naalala ‘yung nabalita sa radyo dati na siya mismo ang pumutol sa sarili niyang ari dahil ito raw ang pinagmumulan ng kasalanan. Bigla kong nilamukos ang diyaryo sabay itinapon sa basurahan para ‘di na kung anu-ano ang naiisip ko. Hmm, kumusta na kaya ‘yung lalaking naputulan?