A Brief Story

     Wala na siyang maisuot na brief. Kung meron man ay masyado ng luma. Yung dating puti kundi man nangingitim ay kulay brown na. Habang ang mga de kolores ay pawang kupas na. Ang diyahe ay tastas at butas butas pa ‘yung iba. Pero katuwiran niya ay hindi naman nakikita ang brief dahil nakapaloob naman. Nagtataka nga siya kung bakit ang iba ay ang mamahal pa ng underwear na kanilang isinusuot gayung hindi nakatago lang naman ito.

    Hindi naman siya katulad ng iba na ipinangangalandakan pa ang suot na brief gaya ng mga hip hop. O ng mga babaeng nakasuot nga ng pantalon nakikita naman ang kuyukot. Hindi naman uubra sa kanya ang ganito dahil malalaman pa ng iba na ang pangit ng isinusuot niyang brief. Buti sana kung bata pa siya ok lang kahit walang suot na brief. Paano kung biglang tumayo si dyunyor tapos nasa pampubliko siyang lugar? Ang masama maitutok niya ito nang ‘di sinasadya sa likod o ‘di-kaya'y sa harap ng isang babae. Kung ‘di siya mapagkamalang nangho-hold up malamang ay masampal siya ng wala sa oras dahil aakalaing nambabastos siya.

    Hindi na niya matandaan kung kailan ba siya huling naibili ng brief ng kanyang nanay. Hay, mabuti pa noong panahon ‘di problema ang brief. Nakabahag lang kasi ang kalalakihan. Panahon na siguro para siya naman ang bumili ng brief para sa kanyang sarili. Tutal magkano lang ba naman ang isang pirasong brief? Ayaw naman niyang bumili ng brief na nakita niya dati sa isang tindahan ng ukay-ukay. Isip-isip niya pati ba naman underwear itinitinda pa sa ukay? Lupet. Paano kung may tulo ang dating may-ari ng brief na ‘yun? Nagpasya siyang sa mall na lang siya bibili ng brief. Pagkakita sa isang tindahan ng mga damit ay agad siyang pumasok. Nagtanong siya sa magandang tindera ng bantay ng shop, “Miss, may tinda ba kayong brief?”  “Sir, ano po bang size?” Bigla siyang napaisip sa tanong ng babae. Hindi yata't itinatanong ng babae ang sukat ng kanyang kargada? Maging siya man ay hindi niya alam kung ilan itong pulgada. Basta't para sa kanya ay sakto lang. Sa kanyang pagkakaalam pa, ang karaniwang Pinoy ay di naman kalakihan ang sukat kung ikukumpara sa mga Amerikano. No matter what size nasa performance 'yan, 'ika nga.  Para tuloy gusto niyang manghirap ng ruler at lumabas para mag-CR at sukatin ang dapat na sukatin.

    Sa tagal mag-isip ni Kim ay namulang bigla ang tindera at parang nabasa niya kung ano ang pagkakaintindi nito sa size. “Sir, ibig kong sabihin kung small, medium o large ba ang size ng hinahanap n'yo na brief?” Tatangu-tango si Kim nang maintindihan ang paliwanag ng tindera. Napalingon siyang bigla at ang dami palang mga kostumer na ngingiti-ngiti sa kanyang likuran. Pakiramdam niya ay wala siya ni kahit ni anong saplot sa katawan dahil nahihiya siya sa kanyang kaengotan.