Hupa

Pakiusap, lisanin na yaring isip

Ayoko nang mabuhay sa panaginip

'Pagkat sumisidhi lang lalo ang sakit

Kung gunita mo'y patuloy pang kakapit.

 

Marahil kapwa tayo mayroong sala

Kung ba't init ng pagsuyo ay nawala

Ba't ako pa rin ay nakatanikala?

Kahit noon ibig ko na ring lumaya.

 

Hanggang ngayon ikaw pa ri'y iniibig

Gayung ang puso ko'y ibig nang mamanhid

Masdan mo, ako na ay nalilimahid

Pusong dalisay nagkaroon ng bahid.

 

Araw-araw pakiwari ko'y tag-ulan

Basang-basa ang buo kong katauhan

Maling damdamin kailan titigilan?

Nawa'y humupa na ang nararamdaman.

 

Ibig kong magbalik gaya noong dati

Kung saan wala ka pa't nagsasarili

Malimot lahat ang sa ati'y nangyari

Nang 'di na sumagi pa sa dili-dili.

 

Nawa'y matanggap ko ang katotohanan

Na ang puso mo'y 'di na sa akin laan

Na ikaw ay isang saglit lang nagdaan

At 'di na magbabalik kailan pa man.