Sino nga ba?

Sana'y 'di ito pagduyan lang sa panaginip
Ng pusong mahilig tumakas sa pagkainip

Bagkus ito'y totoo at 'di lang pag-aaliw

Upang nadaramang lungkot ay maitakwil.

 

Sino kaya ang sa akin ay nababagay?

Ikaw na ba o s'ya ang magiging buhay?

Nawa'y lahat ng ito may mabuting kahinatnan

At litung-lito na yaring isipan.

 

Sa puso ko, siya ang pumasok na una

Ngunit nang makita ka ay mayroon ding nadama

Ikaw na nga ba ang dapat kong ibigin?

O sa kanya ko na lang ito ibaling?

 

Sino nga ba ang matagal ko ng hinihintay?

Bakit naman dumating kayong halos sabay?

Dahil sa inyo mundo ko'y naging makulay

Sino nga ba ang sa akin din ay magmamahal?

 

'Di naman mapaglaro itong puso

At ayokong magtaksil sa ngalan ng pagsuyo

Kayo ay hinding-hindi ko pagsasabayin

'Pagkat matinding sakit lang ang mararating.

 

Hanggang ngayon sadyang 'di ko pa alam

Sa timbangan ng puso, sino'ng mas magaan?

Kung wala sa inyo wala ng nakalaan

Sino sa inyo ang magiging kapalaran?