Wednesday, March 5, 2008

Hamog

May luha sa pusod ng lupa
Tulad ng langit nagliligwak ng basa
Nasaan ang hanap kong init
ng aruga?
Sa malamig na hamog na umaakyat
sa aking mukha.

Hamog na hatid ng patak ng ulan
Na nagtataboy sa katag-arawan
Kumikiliti sa pagal na talampakan
Hinahagkan mga damo't halaman
Ngunit tumuttusok tila kagat ng langgam
Walang dinadalang gunitang binabalikan
Upang mabura't tuluyan nang malimutan.

Bawat umaga bumubulwak ang tubig
Huni ng kilapsaw ang inihihimig
Mula sa ilalim nitong daigdig
Habang tumatabing ang kakapalan
ng ulap
Ay 'di makita ang hinahanap
'Di makalipad tila basang alitaptap.

Kumakapal na nga nang husto ang hamog
Mga paa ko'y 'di makaimbulog
Ito ba'y karugtong ng agos
sa naputol kong pagtulog
sa aking walang hanggang pagkahulog?

No comments:

Related Posts Plugin for WordPress, Blogger...