Isa Kang Mataas na Pangarap na 'di ko Maabot

Ikaw ay naging balsamo ng aking pagkatao

Kasintatag ng puno ng sikomoro

Bunga mo ay sintamis ng tamarindo

Ngunit 'di mapitas 'pagkat bawal diumano.

 

Tila ka matayog na estrelya o bituin

Pinapangarap ngunit 'di kayang abutin

Tinititigan lang kagandahang angkin

Mga kamay ko ay yumayapos sa hangin.

 

Tila ka dagim na sa kalawakan umuusad

Isang balangaw na 'di maabot ng munting palad

Taglay kong pag-asa ay iyong tinilad-tilad

Tila gulay na nadurog matapos matadtad.

 

Isa kang mataas at napakalaking gusali

Nakakalula ang kataasan na itinatangi

'Di ko makamtan ang inaasam na luwalhati

Marahil langit ka nga na sa puso'y nagbigay lugami.

 

Walang halaga ang tayog ng pangungusap

Imakuladang pag-ibig 'di mo matatap

Kaya't kaginhawaan ay ayaw mong malasap

Marahil sa iba ka nasisiyahang makipagtiyap.

 

Isa kang mataas na pangarap na 'di ko maabot

Parang luklak na nakadapo doon sa tuktok

Napakailap at ang tulad ko ay nilimot

Yaring puso kalumbayan ang sumaklot.

 

Kung mamasdan mo ako'y isang basag na kampana

Tumutugtog ng plegarya kaya't luksang-luksa

Simboryo ng simbahan waring babagsak sa lupa

Panalangin kong maging akin ka ay balewala.