Bihagin Natin ang Magdamag

Bihagin natin ang magdamag

H'wag hayaang ito'y makapusag

Upang ang liwanag ay mabanaag

Gapos ng alinlanga'y makakalag,

Habang nagpupuyos ang init

Na namamahay sa ating dibdib

Upang ito'y lalong magrikit

Hayaang masunog ang katauhan

Sa lagablab ng pagtitinginan

Nang magkabisa ating kapangyarihan

Marahas ngunit matimpi at banayad

Pag-ibig nating ayaw paawat

Maanong kapayakan ay ating kitlin

Lalawig ang buhay, walang singlambing

Upang maipadama ang pagmamahal

Sa kabila ng rehas na bakal

'Pagkat malaon na tayong nakaselda

Sa silid ng ating pandama

Kaya't 'dikailangang umalma

Bagkus ito'y hanapin mo sa tuwina

Nanaisin mo pa ba ang hungkag na kalayaan

Sa gitna ng mundong mapanlinlang?

Halina't ikulong natin ang gabi

Habang ang bituin sa ati'y nagsisindi

Mahal kita ng ubod-tindi

At wala ni munting pagsisisi.