Di Ko Man Lang Nasabi

'Di ko man lang nasabi laman ng damdamin

Noong ikaw'y mahal pa sa akin

Dahil nilamon ng agam-agam

Kaya't sarili ay pilit pinigilan.

 

Aanhin ko ang damdaming nagpupuyos

Papakawalan pero masasaktan pagkatapos?

Mas mabuting ito na lang ay igapos

Sairin hanggang sa humupa ang unos.

 

Oo nga't nagawang magpahiwatig

Na sa dibdib ko ikaw ang ang pintig

Ngunit isipan ay 'di na kumatig

Kaya't naghanap ng bagong pag-ibig.

 

Dahil noon ay may iba kang mahal

At 'di ko rin nais pang maghintay

Marahil nga ay 'di tayo nababagay

Kaya't sa dikta ng puso 'di nagpatangay.

 

Magkagayunman 'di ako nagsisisi

Na ang pag-ibig ko sa oyo'y 'di nasabi

Ngayon, natagpuan ko na ang tunay na ligaya

Sana katulad ko ikaw din ay masaya.

 

Salamat, dahil minsan kitang naging kaibigan

Nakapalagayang-loob kahit sa maiksing panahon lamang

Lahat nga sa mundo'y walang katiyakan

Kaya't nilimot ko na aking kapangahasan.