Elemental

Nauulinig ko ang halinghing ng tikbalang
Tila nakikipag-ulayaw sa mga aswang
Habang nagniningas ang pulang mata ng halimaw
May duwendeng itim na nagtatanod
Sa gintong gusi na 'di natin masayod
Kapre, kapre na nasa punong mangga
Ang usok ng tabako panay sa pagbuga
Humahalakhak ng nakakatulilig sa tainga,
Ikaw na tiyanak 'di mo kami maililigaw
'Pagkat baliktad na ang damit nami't pananaw
Ano't ikaw daw dati ay munting anghel
Na biktima ng mga magulang n'yong mangingitil.

Mga dambana para kayong alitaptap
Lilipad-lipad na para bang kulisap
Ano'ng ginagawa n'yo sa puno ng dapdap?,
Magsip[aglabas kayong mga diwata
Diwata ng kagandahan at mga himala
Inyong aliwin ang tao sa pagkariwara
Yamang kayo'y 'di basta likha ng diwang diwara
kayo ba'y kahangalan sa paniniwala
O pag-arok sa mga bagay na mahiwaga?
Bunga lang ba ng kultura't ilusyon?
Ngunit may mga saksing umaayon.

Sa gabing ito nais ko kayoing makasalo
Sa hapag-kainan ng diwang tila naghihingalo
Ang kababalagha'y 'di ganap na maisubo
May bisyong mahirap mawatasan
Tulad ng mundo ninyong ginagalawan
'Di maaninag ng aandap-andap na isipan
Mga elemental kayong nagbibigay-palaisipan
Hindi ako esperitistang may ikatlong mata
'Pagkat ako ri'y maka-elemental na makata
Elemento ng tubig, apoy at hangin aking kapanalig
Katulong sa pagwasak at paglikha ng bagong daigdig.